“നിങ്ങളുടെ അധരങ്ങളില്‍നിന്ന്‌ തിന്‍മയുടെ വാക്കുകള്‍ പുറപ്പെടാതിരിക്കട്ടെ. കേള്‍വിക്കാര്‍ക്ക്‌ ആത്‌മീയചൈതന്യം പ്രദാനംചെയ്യുന്നതിനായി, അവരുടെ ഉന്നതിക്കുതകുംവിധം നല്ല കാര്യങ്ങള്‍ സന്‌ദര്‍ഭമനുസരിച്ചു സംസാരിക്കുവിന്‍.”(എഫേ. 4 : 29)
മധുരമായി സംസാരിക്കുന്നവരോട് നമ്മൾക്ക് നാമറിയാതെ ഒരു പ്രത്യേക ഇഷ്ടമുണ്ട്. പലപ്പോഴും പല അസ്വസ്ഥതകളും പിണക്കങ്ങളും ആരംഭിച്ചതും ആരുടെയോ നാവിൽനിന്ന് അറിയാതെ വീണൊരു വാക്കിൽനിന്നാവും. ചില മുറിവുകളൊക്കെ ഇന്നും നീരൊലിപ്പിച്ച് വ്രണങ്ങളായി ആരുടെയൊക്കെയോ ഹൃദയങ്ങളിൽ.. എന്റെ പിഴ, എന്റെ വലിയ പിഴ
നല്ല വാക്ക് പറയാനാവുക എന്നത് പരി.ആത്മാവിന്റെ ഒരു വരമാണെന്നു ഞാൻ വിശ്വസിക്കുന്നു. അത് വീടിന്റെ അകത്തളങ്ങളിൽ ആയാലും സോഷ്യൽ മീഡിയയിൽ ആയാലും…
നാമെല്ലാവരും പലവിധത്തില്‍തെറ്റുചെയ്യുന്നു. സംസാരത്തില്‍ തെറ്റുവരുത്താത്ത ഏവനും പൂര്‍ണനാണ്‌. തന്‍െറ ശരീരത്തെ മുഴുവന്‍ നിയന്ത്രിക്കാന്‍ അവനു കഴിയും.(യാക്കോ. 3 : 2)
ഞാന്‍ നിങ്ങളോടു പറയുന്നു: മനുഷ്യര്‍ പറയുന്ന ഓരോ വ്യര്‍ഥവാക്കിനും വിധിദിവസത്തില്‍ കണക്കുകൊടുക്കേണ്ടിവരും.നിന്‍െറ വാക്കുകളാല്‍ നീ നീതീകരിക്കപ്പെടും; നിന്‍െറ വാക്കുകളാല്‍ നീ കുറ്റം വിധിക്കപ്പെടുകയും ചെയ്യും.(മത്താ. 12 : 36-37)
വചനങ്ങൾ ഇനിയും ഏറെയുണ്ട്..
ഇത്രയും ഓർത്താൽ മതി..എന്റെ ഒരു നല്ല വാക്കിനാൽ ഭൂമിയിൽ എവിടെയൊക്കെയോ കുഞ്ഞുപൂക്കൾ വിരിയുന്നുണ്ട്. ഏതോ വിദൂരഗ്രാമങ്ങളിലെ പിഞ്ചുകുഞ്ഞുങ്ങളുടെ നിലവിളി ശമിക്കുന്നുണ്ട് … എന്റെ പാഴ് വാക്കുകളിൽ ഏതോ ചിത്രശലഭങ്ങൾ ചിറകറ്റ് വീഴുന്നുമുണ്ട്..
കൃപ നിറഞ്ഞ ദിവസം സ്നേഹപൂർവ്വം..
ഫാ. അജോ രാമച്ചനാട്ട്